A fondo
Kataluniako independentismoa Bruselara bidean

Auzia nazioarteko agertokira, bereziki Europako erakundeen bihotzera eramateko asmoz, eragile subiranistek manifestazioa deitu dute Belgikako hiriburuan. Sinbolismoz beteriko hitzordua izango da, Carles Puigdemont presidentea eta Comin, Serret, Puig eta Comin kontseilariak bertan erbesteratuta daudelako. Milaka lagun espero dituzte Bruselako karriketan eta hainbat izan dira bertaratzeko bideak, horietariko batzuk bildu ditugu. 

GUREAN GAUR|06/12/2017 23:41

Lehenengo hitzordua, 10:30ean izango dute, Parc du Cinquantennaire delakoan. Bertara, Mérode eta Schuman metro geltokietan jaitsita erraz iritsi liteke. Ordubete beranduago, manifestazioa abiatuko da, Bruselako gunerik esanguratsuenetako batzuk igaro ondoren, Jean Rey plazara helduko dira. Bertan, amaiera puntua egongo da, Leopoldpark ezagunaren alboan.

Dagoeneko, ehunka kataluniar Belgikako hiriburuan daude eta kaleetan kantuekin zein esteladak erakutsiz kaleak koloreztatu dituzte bezperan egindako elkarretaratzean. Horietariko askok, sare sozialetan euren esperientziaren berri eman dute. 

Beste asko ANCk edo Omnium-ek antolatutako autobusetan joan dira, herritarrek ordu andana egin dituzte errepidean baina gogotsu abiatu dira Kataluniako herri eta auzo ezberdinetatik. Marea horia bidean da.

Euren autoekin joatea erabaki dutenak ere badira eta kasu askotan Kataluniaren independentzia, preso politikoen askatasuna edo 155. artikuluaren aurkako mezuekin atondu dituzte. 

Trenez edo hegazkinez joatera ausartu edo horretarako baliabideak dituenik ere bada. Horiek horrela, milaka lagun espero dira bihar Bruselan.

Abenduaren 21eko hauteskundeak gerturatzen ari dira eta independentismoak mobilizazioaren bideari iltzatuta jarraitu nahi. Horretarako, aldarria Europako bihotzera eraman nahi izan du. Momentuz, sare sozialetan #RoadToBrussels traola kontinentean zehar hedatu dute.

 
Loading player...