ETS taldeak historia egiten jarraituko du. 20. urteurrena ospatzeko, BEC hiru egunez lepo bete ostean, beste gertakari historiko batekin itzuliko da En Tol Sarmiento. ’Bihotzen Konkista’ kontzertu erraldoia eskainiko du Madrilgo Movistar Arenan, 2026ko apirilaren 25ean. Aurre-salmenta martxoaren 24an hasiko da, astelehenean, eta salmenta orokorra martxoaren 26an, asteazkenean, 10:00etan.

Erronka kolektibo bat planteatzera dator orain ETS: euskal musikaren eta euskal kulturaren 16.000 zalerekin Movistar Arena betetzea.

“Gure mugetatik haratago historia egiteko unea da. Gure herrietako jaiak Madrilera eramatea eta aretoa betetzea sekulako erronka da, baina badakigu gure publikoak harrituta utziko gaituela, beti bezala. Zorionekoak gara bihotzen konkista honetan aitzindari garelako. Garena ospatzeko eta etxean duguna are gehiago baloratzeko bidaia kolektiboa izango da. Ahaztezina izango da”, adierazi dute.