45 urte bete ditu Eusko Legebiltzarrak. Lehen Eusko Legebiltzarra 1980ko martxoaren 31n eratu zen, martxoaren 9an egindako hauteskundeen ostean. Egun horretan bertan legebiltzarkideek kargua hartu zuten, Mahaia osatu eta Juan Jose Pujana hautatu zuten presidente. Aste batzuk igarota, Carlos Garaikoetxea aukeratu zuten lehendakari. Lehen legealdi hartan oraindik ere garrantzitsuak diren legeak onartu ziren, Euskal Autonomia Erkidegoko Erakundeen Egoitza, Jaurlaritzaren Legea eta Euskararen Erabilera Normalizatzeko Oinarrizko Legearena, besteak beste.

Astelehen honetan, Gernikako Juntetxean lehen legealdiko legebiltzarkideak oroitzeko eta omentzeko ekitaldia egin da. 1980ko martxoaren 31n Eusko Legebiltzarra eratu zen egun eta leku berean egin da, eta hara bertaratu dira bilkura horretan egon ziren legebiltzarkideak. Han egon dira ere, halaber, egungo euskal diputatuak, Legebiltzarreko lehendakariak eta Eusko Jaurlaritzako sailburuak. Bertan, irudi historikoak proiektatu dira eta Eusko Legebiltzarreko dominak eman zaizkie legebiltzarkideei eta hil zirenen familiei.

Eusko Legebiltzarrak bilakaera handia izan du 45 urte hauetan zehar, hasieran, gizarte eragileen presentzia txikiagoa zen eta batzorde gutxi antolatzen ziren. Gaur egun, egoera aldatu egin da, batzordeak ugaritzeaz gain, gizarte eragileen presentzia ere areagotu egin da.