Baxoa azterketaren atarian, Bernat Etxepare lizeoko 40 bat ikaslek protesta egin dute Baionako suprefeturaren aurrean, azterketak euskaraz egiteko eskubidea aldarrikatzeko. Ekainaren 15ean hasiko dira Baxoa azterketak, eta lehen egunean filosofia proba idatzia egingo dute goi ikasketak abiatzeko asmoa duten ikasleek. Ondorengo egunetan, ekainaren 17 eta 19an, berezitasunei dagozkien probak izango dituzte. Ikasleek salatu dute aurten ere filosofiako eta berezitasunetako baxoko azterketak frantsesez egin beharko dituztela, nahiz eta ikasketak euskaraz egin dituzten.

Azaldu dutenez, Baionako suprefeturako idazkari nagusiarekin bildu da ordezkaritza bat, eta idazlan bat egiteko proposatu diote, baxoko filosofiako proban egin ohi den gisara gai bat emanda: Zuzena ote da azterketak euskaraz pasatzea debekatzea?. Erantzunik jaso ez dutenez, sinbolikoki 0ko nota ezarri diete 20tik.

Ikasleek gogorarazi dute azken urteotan hainbat protesta egin dituztela helburu berarekin. Halere, oraindik ez dute inolako erantzunik jaso.