Manifestazio jendetsua egin dute Gasteizen Korda espazioaren desalojoa salatzeko

Jendetza bildu da asteazken arratsaldean Gasteizen Korda espazioaren desalojoa salatzeko. “Gora Korda eta gora auzodefentsa” lelopean alde zaharreko kaleak hartu dituzte. Era berean, Ertzaintzak izandako esku hartzea salatu dute, biolentziaz atera baititu goizean lokalaren barruan zeuden gazteak. Herrizomako kideek Hamaika Telebistari jakinarazi diote Ertzaintzak zauritutako eta ondoren atxilotutako kidea jada aske dagoela, eta osasunez ondo dagoela.

Manifestazioaren amaieran komunikatu bat irakurri dute, horretan asteazken goizean bizi izan duten gorrotoa azaldu dute, poliziak egindako 12 orduko operatiboan zehar eta Pintoreria kalera, bi txandetan hurbildutako 8 polizia furgoiena. Euren aburuz, jabetza pribatua guztiaren gainetik defendatzea izan da operatiboaren helburua.

Bingen Zupiria, Segurtasun sailburuak Radio Vitorian Ertzaintzaren operazioa egokia izan dela adierazi du. Azaldu duenez, lokalaren barruan zeuden 10 pertsonek ez zuten desalojoa gauzatzeko erraztasunik ipini, eta horrek eragin zuela Ertzaintzak indarkeria erabili izana. Komunikatuan ere, eskerrak eman izan nahi dizkiete auzo-antolakuntzari, erresistentziaz eta duintasunez Korda defendatu duten kideei, gaua bertan pasa duten auzokideei, janaria eraman dutenei eta baita ere telefonoari adi goiza pasa duten guztiei. Argi utzi nahi izan dute, gatazketan auzokideak zeintzuk diren eta zeintzuk ez ikusten dela, eta eurek badakitela auzokidez inguratuta daudela. Momentu honetan, Korda espazioa zena, Pintoreria kaleko lokala, hormatuta dago, hala ere, kideek aditzera eman dute euren bizitzak defendatzen jarraituko dutela haien jabetzen gainetik.