Gazarako Mugimendu Globalak Israelek hildako ume palestinarren izenak irakurri ditu Gasteizen

Palestinaren genozidioa salatzeko asmoz ekimen desberdinak burutzen ari dira Gasteizen aste honetan zehar, Gazarako Mugimendu Globalak antolatuta. Asteazken honetan Israelek hil dituen 18.000 haur palestinarren izenak irakurtzen hasi dira eta ostiralera arte iraungo du irakurraldiak.

Antolatu dituzten ekimenen baitan Gazarako Mugimendu Globala elkarteko hainbat kidek hasitako gose greba dago. Baraualdian dauden kideek herritarrei ekintza desberdinetan parte hartzeko deia egin diete. Bestalde, ekimenean Gazarako Mugimendu Globala elkarteak salatu du Kutxabank, BBVA, Santander eta antzeko bankuek Israeli mesede egiten dioten eragiketak finantzatzen dituztela eta hori egiteari utz diezaioten eskatu dute.

Arratsaldean kontzentrazioa egingo dute eta horretan Eusko Legebiltzarrari Israelekin harreman komertzialak, instituzionalak eta bestelakoak edukitzeari uzteko eskatuko diote.

Ekimenak abuztuaren 29an amaituko dira, Gasteizko Artium Museotik abiatuko den manifestazio batekin.