29 AGO. 2025 - 15:02h Gazarako Mugimendu Globalak ehunka lagun bildu ditu Gasteizen Palestinaren alde Este navegador no soporta el elemento video. GUREAN GAUR Manifestazio jendetsua izan da ostiral honetan, Gasteizen, Gazarako Mugimendu Globala elkarteak deituta. 'Boikot Israel' lelopean abiatu da Artium Museotik. Aste osoa darama elkarteak protesta-ekintza desberdinak antolatzen palestinar herria jasaten ari den egoera salatzeko. Euren helburua Gazaren legez kanpoko setioa amaitzea da. Era berean, Palestinak askatasunez estatu bat eratzeko duen eskubidea errespetatzea eskatu dute manifestazioan zehar. Bestelako eskakizunak ere entzun dira; horien artean, Eusko Jaurlaritzari Israelekin harreman komertzialak eta instituzionalak edukitzeari uzteko eskatu diote. Halaber, Kutxabank, BBVA, Santander eta antzeko bankuek Israeli mesede egiten dioten eragiketak finantzatzeari uzteko ere eskatu dute. Abuztuaren 31an Bartzelonatik itsasoratuko den Global Sumud Flotillari euren babesa adierazi diote. Ekimen horretan munduko 44 herrialdetako pertsonek hartuko dute parte eta dozenaka itsasontzitan abiatuko dira Gazarako bidean. Helburua Gazara iritsi aurretik setioa hautsi eta itsas korridore bat irekitzea da.