Beñat Gaztelurrutia Gerediaga Elkarteko koordinatzailea izan dugu gaur "Gurean Gaur" Magazinean. Abenduaren 3tik 8ra ospatuko da Durangoko Azokaren 56. edizioa. Aurrez-aurreko Azoka baten aldeko apustua egingo du Gerediaga Elkarteak, Landakon erakusmahaiak jarriz, bisitariak gonbidatuz eta urteroko sortzaile eta kulturzaleen arteko harremanak berreskuratuz.

Iazko azoka, desberdina eta ahaztezina izan zen; izan ere, online eran, zailtasun guztien gainetik Azoka berezia ospatzea lortu zuten lan eta esfortzu handiz.

Aurten, aurrez-aurrekoaz gain, online aukera ere egongo da: "Gune guztiak berreskuratuko ditugu aurten. Beti-betiko azoka bat ikusiko dugu gehigarri batekin, etxetik ere nobedade guztiak eskuratu ahal izatea". Gogotsu eta era berean, urduri daudela azpimarratu du Beñatek. Hala ere, nahiz eta "betiko" azoka itzuli, "aurten, ikasle goiza, zoritxarrez, ez da aurrez aurrekoa izango, baina ordez, haria ez dadin eten, ikastetxeetan lanketa bat egiteko proposamena egin dugu".

Garai zailak tarteko, neurriak mantenduz, modu erosoan eta seguruan bisitatu ahal izango da azoka. Ez galdu bertaratzeko aukera abenduaren 3tik 8ra Durangoko Landako Gunean.

Elkarrizketa osorik, hamaika.eus atarian.