EHEk eta Ikamak euskararen aldeko ekimen batean parte hartu zuten sei kide deklaratzera deitu dituztela salatu dute astearte honetan. Horren aurrean, bi eragileek kanpaina berria abiatu dute, ‘Kriminalizaziorik ez!’ lelopean.

Gertaerak iazko azaroan jazo ziren, euskararen kontrako oldarraldiaren testuinguruan, jakinarazi dutenaren arabera. EHEko eta Ikamako hainbat kide Eusko Jaurlaritzaren Donostiako egoitzara bertaratu ziren, Ibone Bengoetxea Kultura eta Hizkuntza Politikako sailburuari zuzendutako gutuna erregistratzera. Idatzian, euskararen aldeko hizkuntza politika “ausartagoak” eskatu nahi zituzten.