Iberiako lurreko laguntza zerbitzuko langileek deitutako hirugarren greba egunak "hiru ordurainoko atzerapenak eta maleten anabasa" eragin ditu igande honetan Bilboko aireportuan, lau eguneko lanuzteak deitu dituzten sindikatuek jakitera eman dutenez.

Aire-konpainia lanean ari da azken orduotan Bilboko, Bartzelonako eta Kanaria Handiko aireportuetan pilatu diren maleta guztiak bezeroei "ahalik eta azkarren" bidaltzeko. Halaber, greba ez dela "irtenbidea" azpimarratu du Iberiak.

CCOO eta UGT sindikatuek Iberiak egoera horri aurre egiteko duen "ezintasuna" eta "eraginkortasunik eza" salatu dute. Sindikatuen arabera, 17 hegaldiri eragin zien grebak atzo Loiun. Kanaria Handitik Bilborako bidean irten zen hegaldi bateko 180 bidaiarik Bartzelonan igaro dute gaua. Datozen orduotan autobusez egingo dute bidaia, eta, ondorioz, 24 ordu inguru beharko dituzte hasieran hiru ordu bakarrik iraun behar zuen bidaia egiteko.

Hegaldi gehiago aurreikusita daudenez, arazo gehiago espero dira. Greba deitu duten sindikatuen esanetan, bete beharreko gutxieneko zerbitzuak % 90ekoak izan arren, grebaren jarraipena "erabatekoa izaten ari da Loiun", eta Hondarribian, ordea, eragina oso txikia izaten ari da.