Apirilarekin batera Ehun itzali egingo dela iragarri du mugimenduak. Itzali baino lehen, baina, Euskal Herriko 100 herritan independentziaren aldeko mozioak aurkeztu dituzte.

Burujabetza iraultzaren ideian sakontzen hasteko asmoz erregistratu zuten joan den urteko maiatzean independentzia mozioa Plentziako udaletxean. Horrela, Plentziako Udala izan zen Euskal Herriko historiako lehen erakundea bere burua Euskal Errepublikaren parte deklaratzen. Ekainean esan zuten Ehunen asmoa mozio horiek Euskal Herriko udaletxe guztietara eramatea zela. Azaldu dute elite independentistaren ezezkoak ekarri duen lan gehigarriari aurre egiteko Ehun ez dela nahikoa izan eta horregatik, onartuta lana ezin dutela bakarrik aurrera atera, Ehun itzaltzea erabaki dutela.

Hala ere , Ehunek aukera eman nahi die herri horietako pertsona eta alderdiei Euskal Errepublikaren aldeko prozesuan urratsak egiteko. ehun.eus webgunean, mozioa sartu duten herrien zerrenda argitaratzeaz gain, mozioa jaisteko aukera ere luzatu dute. Horrela, mozioa erregistratuta ez dagoen herrietan edonork sartu dezan.

Inoren baimenari itxaron gabe herrietan antolatzeko deia egin dute eta jendea bultzatu nahi dute mozio horiek udaletxeko Osoko Bilkurara eramateko eta bertan onartua izateko.  Martxoaren 26an Durangon eta apirilaren 16an Gasteizen udaletxe horietako osoko bilkuretan Ehunen mozioa eztabaidatu eta bozkatuko da.