Greba deitu dute apirilaren 9 eta 10ean Arabako egoitza eta etxebizitza komunitarioetan. Helburua lehen lan hitzarmena lortzea da, izan ere, sei urte baino gehiago daramate neurrien zain. 40 greba egunen ondoren, aurreko astean, lehenengoz, Arabako Foru Aldundiaren proposamen bat jaso zutela adierazi dute ELAk eta LABek astearte goizean egindako prentsaurrekoan. Jasotako horretan, azaldu dutenez, negoziaziotik kanpo uzten dira euren aldarrikapen guztiak, soldatak eta lanaldia baino ez ditu aipatzen. Hori dela eta, kontraproposamen bat bidal diete Aldundiari eta patronalei.

Kontraproposamenak, besteak beste, soldaten igoera eta lan orduak murriztea eskatzeaz gain, gastu ekonomikorik ez dakarten hobekuntza sozialak ere lantzen ditu, hala nola, lanaldi malguak, atsedenak asteburuetan eta diskriminaziorik ez egotea. Lehen hitzarmena lortzeko bide horretan, ez dituztela inoren presioak eta xantaiak onartuko aditzera eman dute.

Era berean, ohartarazi dute, sektorea duintzeko neurri espezifikoak eta konpromiso politikoak falta direla. Euren hitzetan, sektorean prekarietatea dago patronalek eta aldundiek hala nahi dutelako. Gaineratu dute, adineko egoitzetako langileek gizarteak dituen zaintza beharren zati handi bat betetzen dutela, eta langile hauen lana funtsezkoa dela. Gauzak horrela, sindikatuek argi utzi nahi izan dute ez dutela onartuko langileen lan-baldintzak nabarmen hobetuko ez dituen hitzarmenik.