Arratsaldean, Durangoko Andra Mariko elizpean egin dute oroimen ekitaldia, Gerediaga Elkarteak eta Kriskitin dantza taldeak antolatuta, Durangoko udalaren laguntzarekin. Aurtengoa berezia izan da bi arrazoirengatik: oroimen ekitaldiaren 25. urteurrena izan delako eta Jon Irazabal Gerediaga elkarteko kideari omenaldia egin zaiolako. Bonbardaketaren inguruan ikerketa zabala egin zuen Irazabalek.

Durango 1936 Kultur Elkarteak urteetan batu eta orain GARAIA Durangaldeko ikus-entzunezkoen biltegian dauden lekukotza batzuk berreskuratu ditu ekitaldian, eta tartean, Jon Irazabalen testigantza ere eskaini dute; bertan azaltzen du bonbardaketen ikerketa nola hasi zuen, zein oztopo bizi izan zituen edota oroimen ekitaldia egiteko arrazoiak zeintzuk izan ziren.

Horrez gain, William Randolph Hearst kazetari amerikarraren ehundaka grabazio ezezagun digitalizatu eta argitara eman ditu Kaliforniako Los Angeles Unibertsitateak. Espainiako gerra zibilari buruzko irudiak dira. 
1937ko udaberrian grabatu eta orain arte ikusi gabeko irudiak ere erakutsi dituzte, Durango, Zornotza eta Gernikako irudiak.