Ana Ollo Nafarroako bigarren presidenteorde eta Memoria eta Bizikidetza, Kanpo Ekintza eta Euskara kontseilaria elkarrizketatu dugu Hamaikako Aktualitate Solasaldian. Nafarroako Jauregian lotu gara berarekin; lurraldeko gobernuak motibazio politikoko biktimen aitortzaren inguruan aurrera eramandako lana azaldu du.

Euskararen inguruko hainbat kontu ere aipatu ditu Ollok; hala nola, lanpostu publikoetarako hizkuntza eskakizunari eta hezkuntzan duen egoerari dagokionez. Azken puntu horri erreparatuz, Euskara kontseilariak egun Nafarroa osoan D ereduan ikasteko aukera dagoela azpimarratu du, nahiz eta zonifikazioaren deuseztatzea, "parlamentuko mintzaldiak entzuten badituzu, urrun dagoela" badirudi ere. Horrez gain, euskal hizkuntza, diskurtso negatiboetatik at, "bizikidetza balorea" dela adierazi du, eta Nafarroan hala "bultzatu behar" dela.