Hezkuntza publikoko irakasleek bederatzigarren greba egunari amaiera eman diote. Manifestazio bateratua egin dute Gasteizen, 'Eusko Jaurlaritza negoziatu, Hezkuntza publikoa defendatu' lelopean abiatu dira Europa Jauregitik eta Eusko Jaurlaritzan amaitu da mobilizazioa. Bertan, orain arte egon diren mobilizazioetan idatzitako eskakizunak entregatu dituzte. Steilas, LAB, ELA eta CCOO sindikatuek asteazkeneko greba irakasleen %80ak babestu dutela adierazi dute eta orokorrean bost eguneko greba ziklo honen erantzun positiboa eman dutela.

Adierazi dutenez, egindako grebek argi eta garbi adierazten diote Hezkuntza Saialari badela garaia irakasleen lan baldintzak hobetzeko. Negoziazioa beharrezkoa dela eta lehen bailen edukiak mahai gainean jartzearen garrantzia azpimarratu dute. Hezkuntza sailburuak, adierazi duenez, “borondate irmoa” du negoziatzeko baina horretarako lasaitasuna ezinbestekoa da, hortaz mobilizazioak amaitu arte itxarongo dutela esan du. Irakasleek, berriz,
argi adierazi dute: hezkuntza sailak ez baditu euren eskakizunak onartzen, greba deialdi gehiago iragarriko dituzte.

Mobilizazioan zehar aldarrikapenak etengabeak izan dira eta mobilizaziora bertaratutako langileek argi dute besteak beste lan hitzarmen berriak irakasleen osasun fisiko eta mentala zaintzeko baldintzak, lan zama arintzeko neurriak, soldata hobeak, burokrazia gutxiago eta denbora gehiago ikasleentzako jaso behar dituela. Hainbat irakaslek Eusko Jaurlaritzaren Lakuako egoitzaren aurrean pasatu dituzte astelehen eta astearteko gauak, modu horretan, Hezkuntza Saialari presioa egiteko. Bertan gaua igaro duten irakasleek adierazi dute ekimen hori sindikatuek deitutakoetatik aparte dagoela. Arratsaldean, Gasteizen, eskola publikoetako familiek elkarretaratzea antolatu dute irakasleei babesa adierazteko.