Akordiorik gabe amaitu da Laudioko Guardian enpresako Enplegu Erregulazioko Espedientearen negoziazio epea. Hala jakinarazi du ELA sindikatuak, salatzen, prozesuan konpainiak ez dituela kaleratzeen arrazoiak egiaztatu eta planteatzen duen aukera bakarra kaleratzean kalte-ordainen truke onartzea dela. Beraz, azaldu duenez, kaleratze kolektiboaren aurka egingo du epaitegietan.

ELAk ohartarazi du kontsulta aldia akatsekin eraman zela aurrera, Laudioko enpresako labea modu irregularrean itzali zelako. Era berean, gaitzetsi du, inoiz ez dela industria proiekturik egon lanpostuak bermatzeko eta gainera, salatu du, Guardian ixteko prozesuan, erakundeak eta batez ere Eusko Jaurlaritza, multinazionalarekin batera joan izana. Honen guztiaren aurrean, sindikatuak helegitea aurkeztuko du bide juridikoa hasteko. Akordio bat lortzeko bidean, aurreko astean Eusko Jaurlaritza hainbat inbertsore posibleekin bildu zen, bilera horretan bi inbertsore posiblek “proiektu osagarriak” aurkeztu zituztela adierazi zuen Mikel Jauregi Industria, Trantsizio Energetiko eta Jasangarritasun sailburuak. Zehaztasun gehiago eman ez zituen arren, Jauregik, aukera hori Jaurlaritzaren gustukoa zela jakinarazi zuen, gogoraraziz prest dagoela lantegirako proiektua diruz laguntzeko.

Hala ere, enpresak hasieratik ekoizpen arrazoiak erabili ditu Laudioko planta ixteko argudiotzat, esandakoaren arabera, ez baita bideragarria plantako beira labearen matxurak konpontzea. Enpresa batzordea osatzen duten sindikatuek, ELAk eta LABek, ez datoz bat enpresak esandakoarekin, euren hitzetan, inbertsio txiki batekin matxurak konpon daitezke. Aspalditik daude Guardianeko langileak borrokan enpresa itxi ez dadin. Izan ere, enpresaren
zuzendaritzak urtarrilaren 21ean jakinarazi zion enpresa batzordeari lantegia ekainean ixteko asmoa zuela, eta itxiera horrek 171 langileen kaleratzea eragingo zuela. Lan erregulazioa espedientea berriz, duela sei aste aurkeztu zuten, eta asteazkenean amaitu zen baldintzak negoziatzeko epea.