Milaka lagunek parte hartu zuten larunbatean Bilbon Gure Eskuk antolatutako manifestazioan, 'Herri libre bat. Euskal Herriak erabaki' lelopean. Manifestazioa Bilboko Casillatik abiatu zen, ikurrina eta Nafarroako banderez girotuta, eta amaiera Udaletxeko plazan izan zen. Han, Irantzu Perello eta Josu Etxaburuk hartu zuten hitza, eta adierazi zuten "hitzak erabaki bilakatzeko garaia" dela. Nabarmendu zuten azken urteetako borroka eta lanari esker, gaur egun aske eta burujabe izan nahi duen herri baten irudia gero eta argiagoa dela.

Manifestazioan, gainera, elkartasun keinu ugari egin zitzaizkion nazioarteko beste herri batzuei ere, hala nola Palestinari. Jon Maia bertsolaria ere manifestazioan izan zen eta esperantzaren alde etorkizuna herritarren esku dagoela aldarrikatu zuen.

Manifestazioak babes zabala jaso zuen alderdi politiko, sindikatu eta gizarte eragileen aldetik. EH Bilduko ordezkariak, Ahal Dugu-koak eta EAJko kide batzuk bertan izan ziren. Sindikatuen artean, ELAko Amaia Muñoak eta LABeko Igor Arroyok nabarmendu zuten erabakitzeko eskubidea garrantzitsua dela bizi baldintzak hobetzeko eta eskubide sozialak bermatzeko. Euskalgintzako hainbat eragilek ere bat egin zuten aldarrikapenarekin eta herri aske batek hizkuntzaren etorkizuna bermatzeko aukera gehiago izango lituzkeela azpimarratu zuten.

Gure Eskuko antolatzaileen esanetan, mobilizazioak beste urrats bat adierazten du euskal herritarren burujabetza prozesuan eta adierazi zuten Euskal Herriak bere etorkizuna libreki erabaki dezan, aktibazio soziala eta konpromisoa funtsezkoak izango dira aurrerantzean ere.