Gasteiz Anitza elkarteak auzoetako arazoak modu integratzaile batetik lantzeko deia egin du

Gasteiz Anitza elkarteak auzoetan dauden arazoak perspektiba integratzaile batetik lantzeko deia egin du. Hainbat kolektibo eta eragile desberdinek osatzen dute Gasteiz Anitza, Harrera Sarea, Mugimendu Feminista, etxebizitzaren arazoa lantzen duten elkarteak eta talde antirrazista eta antifaxistak, besteak beste. Euren helburua, Gasteizko auzoetan dauden arazoei planteamendu berri bat ematea da, hain zuzen, tentsio handiko koexistentziatik bizikidetzara pasatzea, auzoetan bizi direnen arteko konexio sozialak eraikitzeko. Bide horretan, auzokideak inplika daitezela eskatu dute astelehen goizean emandako prentsaurrekoan.

Santiagoko Etorbidean okupatutako lokalen auzian esku hartu dutela azaldu dute Gasteiz Anitzakoek. Hain zuzen, etxebizitza blokeko behe lokaletan bizitzen hasi diren gazteek ezinegona sortu dute zenbait bizilagunen artean, eta horren aurrean bai auzokide zein gazteekin hitz egin dutela adierazi dute. Azkenean, konponbide arrakastatsua lortu dutela jakinarazi dute, izaera komunitarioren bitartez eta bizilagunen beharrei erantzuten. Hala ere, ohartarazi dute, gazteen egoera zaurgarria izaten jarraitzen duela.

Okupatutako lokalen auziaren harira, Gizarte Politiketako zinegotziak adierazi du konponbide bat topatzeko lanetan ari direla. Berarekin bat egin dute oposizioko alderdiak, euren iritziz, gazteek ezin dute okupatutako lokaletan bizitzen jarraitu, hala ere, eman beharreko irtenbideari dagokionez iritzi kontrajarriak dituzte.

Gasteiz Anitzekoek argi dute, eurek soilik nekez lortuko dutela ezer konpontzea, horregatik Gasteizko Udalari eta gizarte eragileei inplikatzeko eskatu diete. Alabaina, erakundeen laguntzarik ez dutela izan salatu dute, gaineratuz, zerbitzu publikoen maila “erabat eskasa” izan dela eta horren aurrean “sare zabal eta eraginkor” bat izatea ezinbestekoa dela.

Prentsaurrekoari amaiera eman diote mezu argi batekin, egoera zaurgarrian dauden pertsonen aurkako diskurtso baztertzaileak biderkatu dira eta horretan eskuineko alderdi eta hainbat komunikabideen jarrera gaitzetsi dute, esandakoaren arabera, haien interesen mesedetan bazterrak nahastu eta beldurra zabaltzen dute.