Arabako Auzitegiak 21 antiabortisten absoluzioa berretsi du

Ostegun honetan, Arabako Probintzia Auzitegiak Askabide klinikaren aurrean protesta egin zuten 21 pertsonen absoluzioa berretsi du. Auzitegiaren arabera, klinikaren aurrean bildutakoen jokabidea ez zen «jazarpena» izan, eta "ekintza gogaikarri" kontzeptua juridikoki "zehaztugabea" dela ebatzi du. 

2022ko iraila eta azaroa bitartean, 21 pertsona horiek Askabide klinikaren aurrean bildu ziren abortuaren aurka protestatzeko. Otoitz egiten zuten, batzuetan isilik eta beste batzuetan ozen, eta zenbaitek "ez zaude bakarrik" eta "hemen gaude zuri laguntzeko" bezalako kartelak eraman zituzten. Klinikako arduradunek eta zenbait lekukok adierazi zuten elkarretaratzeek intimidatuta sentiarazi zituztela. Akusatuek, berriz, ukatu egin zuten inori presiorik edo irainik egin izana, eta otoitz egitera mugatu zirela azaldu zuten. Fiskaltzak bost hilabeteko kartzela-zigorra eta klinikari 20.000 euroko kalte-ordaina eskatu zituen.

Hala ere, auzitegiak ondorioztatu du Gasteizko Zigor Arloko Lehen Epaitegiaren epaia arrazoitua dagoela eta zuzenbidearekin bat datorrela, eta ez dagoela helegitea ontzat jotzeko argudiorik. Arabako Probintzia Auzitegiaren ebazpena ez da irmoa, eta Espainiako Auzitegi Gorenean kasazio errekurtsoa aurkezteko aukera dago.